Jio, Airtel, Vi: eSIM மாறுவது லாபமா? நஷ்டமா?

Jio, Airtel, Vi: ஸ்மார்ட்போன் சந்தையில் நாளுக்கு நாள் புதிய தொழில்நுட்பங்கள் (New Technologies) மிக வேகமாக வளர்ந்து வரும் நிலையில், நாம் அனைவரும் நீண்ட காலமாகப் பயன்படுத்தி வரும் பிளாஸ்டிக் சிம் கார்டுகளுக்கு நிரந்தரமாக விடைபெறும் காலம் மிகவும் நெருங்கிவிட்டது. இந்தியாவில் ஜியோ (Jio), ஏர்டெல் (Airtel), விஐ (Vi) போன்ற முன்னணி நெட்வொர்க் நிறுவனங்கள் இப்போது இ-சிம் (eSIM) சேவையை வாடிக்கையாளர்களிடம் மிக வேகமாக விரிவுபடுத்தி வருகின்றன.

தொடக்கக் காலத்தில் கிட்டத்தட்ட ஒரு ஏடிஎம் கார்டு அளவில் இருந்த சிம் கார்டுகள், காலப்போக்கில் மினி, மைக்ரோ எனத் தொடர்ந்து சுருங்கி, தற்போது நம் விரல் நுனி அளவிலான நானோ சிம் (Nano SIM) ஆக மாறிவிட்டன. இப்போது அந்தப் பிளாஸ்டிக் சிம்முக்கே முற்றுப்புள்ளி வைக்கும் விதமாக இந்த அட்டகாசமான இ-சிம் தொழில்நுட்பம் வந்துவிட்டது. நாம் இதுவரை பயன்படுத்தி வந்த வழக்கமான சிம் கார்டுகளை விட இது உண்மையிலேயே சிறந்ததா? பிசிக்கல் சிம் மற்றும் இ-சிம் ஆகிய இரண்டிலும் உள்ள முக்கியமான நன்மைகள் மற்றும் தவிர்க்க முடியாத குறைபாடுகள் என்னென்ன என்பதை இங்கு விரிவாகப் பார்ப்போம்.

Physical SIM

பிசிக்கல் சிம் பயன்கள்: பல ஆண்டுகளாக நாம் அனைவரும் எந்தவொரு சிக்கலும் இல்லாமல் பயன்படுத்தி வரும் சாதாரண பிளாஸ்டிக் சிம் கார்டுகளின் மிகப்பெரிய பலம் அதன் எளிமை (Simplicity) தான். ஒருவேளை உங்கள் மொபைல் போன் எதிர்பாராத விதமாகத் தண்ணீரில் விழுந்து பழுதாகிவிட்டாலோ அல்லது டிஸ்பிளே முழுமையாக உடைந்துவிட்டாலோ, எந்தவொரு கவலையும் இன்றி சிம்மை மட்டும் கழற்றி வேறு ஒரு சாதாரண போனில் போட்டு உடனே பயன்படுத்திவிடலாம்.

இதற்கு நீங்கள் எந்தவொரு வாடிக்கையாளர் மையத்தையும் (Customer Care) அழைக்க வேண்டிய அவசியமே இல்லை. எந்தவொரு நீண்ட ஆக்டிவேஷன் நடைமுறையும் இல்லாமல், ஒரு சிறிய பின் மூலம் கார்டை வெளியே எடுத்து இன்னொரு போனில் போட்ட அடுத்த விநாடியே சிக்னல் கிடைத்துவிடும். அடிக்கடி பல புதிய போன்களை மாற்றி பயன்படுத்துபவர்களுக்கு (Frequent Phone Changers) இந்த பிசிக்கல் சிம் ஒரு மிகச்சிறந்த வரப்பிரசாதமாகவே இருக்கிறது.

இதுவும் படியுங்கள்: iPhone 17 Pro Price Drop: பிளிப்கார்ட் சேலில் ரூ.17,000 தள்ளுபடி!

eSIM Benefits

இ-சிம் நன்மைகள்: பிளாஸ்டிக் கார்டுகளுக்குப் பதிலாக உங்கள் போனைத் தொழிற்சாலையில் தயாரிக்கும்போதே அதன் மதர்போர்டிலேயே (Motherboard) பதிக்கப்பட்ட ஒரு சிறிய மின்னணு சிப் தான் இந்த எம்பெடட் சிம் (Embedded SIM). இதை வாங்க நீங்கள் எந்த மொபைல் கடைகளுக்கும் நேரில் செல்ல வேண்டியதில்லை. உங்களுக்குத் தேவையான நெட்வொர்க் நிறுவனத்திடம் இருந்து ஆன்லைன் மூலமாக ஒரு க்யூஆர் கோட் (QR Code) பெற்று ஸ்கேன் செய்தாலே சில நிமிடங்களில் நெட்வொர்க் ஆக்டிவேட் ஆகிவிடும்.

குறிப்பாக, அடிக்கடி வெளிநாடுகளுக்கு பயணம் செய்பவர்கள் (International Travelers) அந்தந்த நாட்டின் லோக்கல் நெட்வொர்க்கை மிக எளிதாக ஆன் செய்துகொள்ள முடியும். போனுக்குள் சிம் கார்டு போடும் சிம் ட்ரே (SIM Tray) இல்லாததால், அந்த காலி இடத்தில் போன் நிறுவனங்கள் இன்னும் சற்று பெரிய பேட்டரியை (Large Battery) வைக்க முடியும். மேலும், வாங்குனா இப்படி ஒரு போன்வாங்கனும் என்று சொல்லும் அளவிற்கு, ஒரே போனில் சுமார் 5 முதல் 6 இ-சிம் புரொஃபைல்களை (eSIM Profiles) வரை சேமித்து வைத்துக் கொள்ளும் சிறப்பான வசதியும் இதில் உள்ளது.

இதுவும் படியுங்கள்: GPAY, PHONEPE-ல வந்தாச்சு புதிய ரூல்! - பணம் அனுப்பும் முன் உஷார்! | Upinew Rules | GPAY | Phonepe

Security

பாதுகாப்பு அம்சங்கள்: இ-சிம் பயன்படுத்துவதன் மிகப்பெரிய லாபம் அதன் அபரிமிதமான பாதுகாப்பு (Security Features) தான். ஒருவேளை உங்கள் போன் எதிர்பாராதவிதமாகத் திருடப்பட்டால், திருடனால் வழக்கம்போல சிம் கார்டை கழற்றி வீசவே முடியாது. சரியான பாஸ்வேர்டு இல்லாமல் இ-சிம்மை வேறு ஒரு போனுக்கும் மாற்ற முடியாது. இதனால் போலீஸ் உதவியுடன் திருடர்களை மிக எளிதாக ட்ராக் செய்து பிடித்துவிடலாம்.

ஆனால் இதில் உள்ள மிகப்பெரிய சிக்கல் என்னவென்றால், உங்கள் போன் திடீரென பழுதாகிவிட்டால் உடனடியாக உங்கள் நம்பரை வேறு போனுக்கு மாற்றி அவசரத்திற்குப் பேச முடியாது. மீண்டும் கஸ்டமர் கேரைத் தொடர்புகொண்டு அல்லது நெட்வொர்க் கடையைத் தேடி அலைந்து புதிய க்யூஆர் கோட் வாங்க 24 மணி நேரம் வரை காத்திருக்க வேண்டும். தற்போதைக்கு விலை உயர்ந்த பிரீமியம் ஸ்மார்ட்போன்களில் (Premium Smartphones) மட்டுமே இந்த வசதி உள்ளது. இருப்பினும் எதிர்காலத்தில் எல்லா போன்களிலும் இ-சிம் கட்டாயமாக்கப்படும் என்பதே தொழில்நுட்ப உலகின் தற்போதைய நிதர்சனமான உண்மையாகும்.