SBI Data Leak: SBI வாடிக்கையாளர்களுக்கு அதிர்ச்சி! டார்க் வெப்பில் கசிந்த தனிப்பட்ட தகவல்கள்; வங்கி விளக்கம்!

SBI Data Leak: நாட்டின் முன்னணி பொதுத்துறை வங்கியான பாரத ஸ்டேட் வங்கி (State Bank of India - SBI) வாடிக்கையாளர்களின் தனிப்பட்ட தகவல்கள் டார்க் வெப் (Dark Web) தளத்தில் கசிந்துள்ளதாக பங்குச் சந்தைக்கு அளிக்கப்பட்ட அதிகாரப்பூர்வ அறிக்கையில் வங்கி நிர்வாகம் உறுதிப்படுத்தியுள்ளது. இணையத்தில் சுமார் 3.75 லட்சம் ஆவணங்கள் கசிந்ததாகக் கூறப்பட்ட நிலையில், அதில் முதற்கட்ட ஆய்வில் 3,897 வாடிக்கையாளர்களின் அடையாளம் காணக்கூடிய தனிப்பட்ட தகவல்கள் (PII) இருப்பது தெரியவந்துள்ளது.

வங்கித் தரப்பில் அன்றாட வர்த்தகம் எவ்வித தடங்கலுமின்றி இயங்குவதாகத் தெரிவிக்கப்பட்டாலும், வாடிக்கையாளர்களுக்கு உடனடியாக குறுஞ்செய்தி மற்றும் மின்னஞ்சல் வாயிலாக எச்சரிக்கை விடுக்க வேண்டும் என இணைய உரிமைகள் அமைப்பான இன்டர்நெட் ஃப்ரீடம் ஃபவுண்டேஷன் (IFF) போர்க்கொடி தூக்கியுள்ளது. இந்தத் தரவு கசிவின் உண்மைப் பின்னணி, கசிந்த முக்கிய தகவல்கள் மற்றும் வாடிக்கையாளர்கள் தற்காத்துக் கொள்ள வேண்டிய வழிகளை இப்போது விரிவாகப் பார்க்கலாம்.

SBI Cyber Attack

சைபர் அட்டாக் விவரங்கள்: இணையத்தில் 'SIRIUSIM' என்ற ஹேக்கர் குழுவால் எஸ்பிஐ வாடிக்கையாளர்களின் கடன் விண்ணப்பங்கள், கணக்குத் தொடக்கப் படிவங்கள் அடங்கிய 3.75 லட்சம் சிஎஸ்வி (CSV) கோப்புகளும், 2,722 பிடிஎஃப் (PDF) கோப்புகளும் கசியவிடப்பட்டதாகத் தகவல்கள் வெளியாகின. இதனையடுத்து துரிதமாகச் செயல்பட்ட எஸ்பிஐ தகவல் தொழில்நுட்பப் பிரிவு, சைபர் பாதுகாப்பு நெறிமுறைகளை அமல்படுத்தி ஆய்வை முடுக்கிவிட்டுள்ளது.

SBI Dark Web Leak

டார்க் வெப் தரவு கசிவு: வங்கியின் முதற்கட்ட சோதனையில், டார்க் வெப் தளத்தில் 3,897 கணக்குகளின் தனிப்பட்ட தகவல்கள் கசிந்திருப்பது கண்டறியப்பட்டுள்ளது. இதில் வாடிக்கையாளர்களின் பெயர்கள், பாலினம், பிறந்த தேதி, பதிவு செய்யப்பட்ட மொபைல் எண்கள், குடியிருப்பு முகவரிகள், மின்னஞ்சல் முகவரிகள், வங்கி கிளைக் குறியீடுகள், வாடிக்கையாளர் தகவல் கோப்பு எண்கள் (CIF) மற்றும் கடன் தொடர்பான முக்கிய மெட்டாடேட்டா ஆகியவை அடங்கும். எனினும், இந்தத் தரவு கசிவால் வாடிக்கையாளர்களின் வங்கி இருப்புத் தொகையோ அல்லது இணைய வங்கி பாஸ்வேர்டுகளோ திருடப்படவில்லை என விளக்கப்பட்டுள்ளது.

SBI Bank Operations

வங்கி வணிகச் செயல்பாடுகள்: இந்த பாதுகாப்பு அச்சுறுத்தலால் வங்கியின் முக்கிய பிரதான அமைப்புகளுக்கோ (Core Banking Operations) அல்லது அன்றாட பணப் பரிவர்த்தனைகளுக்கோ எந்தவித நிதி இழப்போ அல்லது பாதிப்போ ஏற்படவில்லை என்று எஸ்பிஐ தெளிவாகக் குறிப்பிட்டுள்ளது. தங்களது நிதிச் சேவைகள் மற்றும் வர்த்தக நடவடிக்கைகள் வழக்கம் போல தடங்கலின்றி இயங்கி வருவதாகவும் தெரிவித்துள்ளது.

SBI IFF Demands

ஐஎஃப்எஃப் அமைப்பின் கோரிக்கைகள்: பங்குச் சந்தைக்குத் தகவல் தெரிவித்த எஸ்பிஐ வங்கி, பாதிக்கப்பட்ட 3,897 வாடிக்கையாளர்களுக்கு இதுவரை நேரடியாக எந்தவொரு தனிப்பட்ட எச்சரிக்கையும் விடுக்கவில்லை என்று இன்டர்நெட் ஃப்ரீடம் ஃபவுண்டேஷன் (IFF) குற்றம்சாட்டியுள்ளது. பாதிக்கப்பட்ட வாடிக்கையாளர்களுக்கு உடனடியாக எஸ்எம்எஸ் (SMS) மற்றும் மின்னஞ்சல் மூலம் எச்சரிக்கை அனுப்ப வேண்டும், அவர்களின் கணக்கு நிலவரத்தைச் சரிபார்க்க பிரத்யேக உதவி மையத்தை உருவாக்க வேண்டும் மற்றும் நிதி இழப்பு ஏற்பட்டால் ஆர்பிஐ (RBI) விதிகளின்படி நஷ்டஈடு வழங்க வேண்டும் என ரிசர்வ் வங்கி மற்றும் எஸ்பிஐ தலைவருக்கு ஐஎஃப்எஃப் கடிதம் அனுப்பியுள்ளது.

SBI Customer Safety

வாடிக்கையாளர்களுக்கான பாதுகாப்பு வழிகாட்டுதல்: இத்தகைய தனிப்பட்ட தகவல்கள் ஆன்லைனில் கசிந்திருப்பதால், வாடிக்கையாளர்களைத் தொடர்புகொண்டு வங்கியின் மேலாளர் அல்லது கடன் பிரிவு அதிகாரி போல் பேசி நூதன சைபர் மோசடிகள் (Targeted Phishing Scams) அரங்கேற வாய்ப்புள்ளது. எனவே எஸ்பிஐ வாடிக்கையாளர்கள் தங்களது ஓடிபி (OTP), பாஸ்வேர்டு போன்றவற்றை யாருடனும் பகிரக்கூடாது என்றும், வங்கிக் கணக்கின் பணப்பரிவர்த்தனைகளைத் தொடர்ந்து கண்காணித்து சந்தேகத்திற்கிடமான அழைப்புகளுக்கு பதிலளிக்க வேண்டாம் என்றும் அறிவுறுத்தப்படுகிறார்கள்.

Source