.png){kind=small}
LPG Cylinder Rules: வீட்டு உபயோக சமையல் கேஸ் சிலிண்டர் பயன்படுத்துபவரா நீங்கள்? அப்படியென்றால் உங்களுக்கான மிக முக்கியமான எச்சரிக்கை அறிவிப்பு வெளியாகியுள்ளது. மானிய விலையில் தொடர்ந்து எரிவாயு சிலிண்டர்களைப் பெற விரும்பும் வாடிக்கையாளர்கள், வரும் அக்டோபர் 1-ம் தேதிக்குள் தங்களது பயோமெட்ரிக் ஆதார் சரிபார்ப்பை (Biometric Aadhaar authentication) கட்டாயம் முடித்திருக்க வேண்டும் என மத்திய அரசு அதிரடியாக உத்தரவிட்டுள்ளது.
அக்டோபர் 1 முதல் புது ரூல்ஸ்!
குறிப்பிட்ட காலக்கெடுவுக்குள் இந்த நடைமுறையை முடிக்கத் தவறினால், வங்கிக் கணக்கில் நேரடியாக வந்து விழும் எல்பிஜி சிலிண்டர் மானியம் (LPG cylinder subsidy) நிறுத்தப்படும் அபாயம் ஏற்பட்டுள்ளது. பெட்ரோலியம் மற்றும் இயற்கை எரிவாயு அமைச்சகம் வெளியிட்டுள்ள இந்த புதிய வழிகாட்டுதலின் முழு விவரங்கள், யாரெல்லாம் இதைச் செய்ய வேண்டும், வீட்டிலிருந்தபடியே மொபைல் மூலம் முடிப்பது எப்படி என்பதை இப்போது விரிவாகப் பார்க்கலாம்.
LPG Biometric Aadhaar Verification Rules
எல்பிஜி ஆதார் சரிபார்ப்பு புதிய விதிமுறைகள்: அரசு வழங்கும் சமையல் எரிவாயு மானியம் உண்மையான மற்றும் தகுதியான ஏழை, எளிய குடும்பங்களுக்கு மட்டுமே போய்ச் சேர வேண்டும் என்பதை உறுதி செய்யவும், வீட்டு உபயோக சிலிண்டர்கள் வணிக பயன்பாட்டிற்குத் தவறாகப் பயன்படுத்தப்படுவதைத் தடுக்கவும் இந்த அதிரடி நடவடிக்கை எடுக்கப்பட்டுள்ளது.
ஏற்கனவே நாடு முழுவதும் உள்ள வீட்டு உபயோக நுகர்வோரில் சுமார் 27.43 கோடி பேர் (89.9%) தங்களது பயோமெட்ரிக் சரிபார்ப்பை வெற்றிகரமாக முடித்துவிட்டனர். இவர்கள் இனி புதிதாக எதுவும் செய்யத் தேவையில்லை; வழக்கம்போல கேஸ் சிலிண்டர்களை புக் செய்து பெற்றுக் கொள்ளலாம். இன்னும் இந்தச் சரிபார்ப்பை முடிக்காத மீதமுள்ள வாடிக்கையாளர்கள் மட்டுமே அக்டோபர் 1-க்குள் முடிக்க வேண்டும். இந்த காலக்கெடு ஏற்கனவே நான்கு முறை நீட்டிக்கப்பட்டுவிட்டதால், இதுவே இறுதி வாய்ப்பாகக் கருதப்படுகிறது.
இதையும் படியுங்கள்: 51% அதிரடி தள்ளுபடி! 55 இன்ச் Acer QLED கூகுள் டிவி மாஸ் ஆஃபர்!
How to Complete LPG Biometric Verification
மொபைல் மூலம் சரிபார்ப்பை முடிப்பது எப்படி: ஆதார் சரிபார்ப்பை முடிக்காதவர்களுக்கு மானியம் மட்டுமே நிறுத்தப்படுமே தவிர, சிலிண்டர் விநியோகம் வழக்கம்போல் தொடரும் என அரசு தெளிவுபடுத்தியுள்ளது. வாடிக்கையாளர்கள் தங்களது சிலிண்டர் டெலிவரி செய்யப்படும் போதோ அல்லது கேஸ் ஏஜென்சி அலுவலகத்திற்கு நேரிலோ சென்று கைரேகை அல்லது கண் விழித் திரை பதிவு மூலம் சரிபார்ப்பை முடித்துக் கொள்ளலாம்.
இதனைவிட எளிதாக, வீட்டிலிருந்தபடியே ஸ்மார்ட்போன் வழியாக முடிக்கவும் எண்ணெய் நிறுவனங்கள் தனித்தனி செயலிகளை அறிமுகப்படுத்தியுள்ளன:
- இன்டேன் கேஸ் (Indane Gas): 'IndianOil ONE' மொபைல் ஆப்
- பாரத் கேஸ் (Bharat Gas): 'HelloBPCL' மொபைல் ஆப்
- ஹெச்பி கேஸ் (HP Gas): 'HP PAY' மொபைல் ஆப்
இந்த அதிகாரப்பூர்வ செயலிகளைப் பதிவிறக்கம் செய்து, ஆதார் ஃபேஸ் ஆர்டி (Aadhaar FaceRD) செயலி வழியாக முகத்தை ஸ்கேன் செய்தே சில நொடிகளில் பயோமெட்ரிக் சரிபார்ப்பை எளிதாக முடித்துக் கொள்ளலாம்.
ஆதார் பயோமெட்ரிக் செய்ய விரும்பாத வாடிக்கையாளர்கள், தங்களது விருப்பத்தை எண்ணெய் நிறுவனங்களின் இணையதளம் அல்லது வாட்ஸ்அப் சாட்பாட் மூலம் பதிவு செய்துவிட்டு, மானியம் இல்லாத சந்தை விலையில் 5 கிலோ அல்லது 10 கிலோ சிலிண்டர்களைத் தொடர்ந்து பெற்றுக்கொள்ள முடியும். எனவே மானியத் தொகை தொடர்ந்து உங்கள் கணக்கில் வர வேண்டும் என்றால், உடனடியாக இந்த வேலையை முடித்துக் கொள்வது நல்லது.
