.png){kind=small}
செயற்கை நுண்ணறிவு (Artificial intelligence) மற்றும் கிளவுட் கம்ப்யூட்டிங் தொழில்நுட்பங்களின் அசுர வளர்ச்சியால் உலகம் முழுவதும் மெமரி சிப்களுக்குக் கடுமையான தட்டுப்பாடு நிலவி வருகிறது. இதனால் DRAM மற்றும் NAND ஃபிளாஷ் சிப்களின் விலை சர்வதேச சந்தையில் கிடுகிடுவென உயர்ந்து வரும் சூழலில், சீனாவின் முதன்மையான சிப் தயாரிப்பு நிறுவனங்களான சிஎக்ஸ்எம்டி (CXMT) மற்றும் ஒய்எம்டிசி (YMTC) நிறுவனங்களுக்கு இடையே உள்நாட்டு சந்தையிலேயே நேரடி யுத்தம் வெடித்துள்ளது.
இத்தனை நாட்களாகத் தங்களுக்குள் சந்தையைப் பிரித்துக் கொண்டு தனித்தனி பிரிவுகளில் செயல்பட்டு வந்த இவ்விரு நிறுவனங்களும், இனி ஒரே சந்தைக் களத்தில் நேருக்கு நேர் மோதும் நிலைக்கு நகர்ந்துள்ளன. சர்வதேச தொழில்நுட்ப அரங்கில் பெரும் எதிர்பார்ப்பை ஏற்படுத்தியுள்ள இந்த சீன நிறுவனங்களின் சிப் தயாரிப்புப் போட்டி, காப்புரிமை யுத்தம் (Patent battle) மற்றும் சந்தை ஆதிக்கத்தின் முழு விவரங்களை இப்போது பார்க்கலாம்.
YMTC and CXMT Memory Chip War
DRAM மற்றும் NAND சந்தையில் நேரடி மோதல்: இதுவரை ஸ்மார்ட்போன் மற்றும் கணினிகளுக்கான ஸ்டோரேஜ் சிப்களான NAND ஃபிளாஷ் தயாரிப்பில் மட்டுமே முழு கவனம் செலுத்தி வந்த ஒய்எம்டிசி (YMTC), வரும் 2026-ம் ஆண்டின் இறுதிக்குள் மொபைல் போன்களுக்கான எல்பிடிடிஆர்5 டிராம் (LPDDR5 DRAM) தயாரிப்பைத் தொடங்க திட்டமிட்டுள்ளது. ஆரம்பத்தில் மாதம் ஒன்றுக்கு 25,000 வேஃபர்கள் உற்பத்தித் திறனுடன் களமிறங்கும் இந்நிறுவனம், எதிர்காலத்தில் 3D DRAM மற்றும் அதிவேக ஏஐ-க்குத் தேவைப்படும் எச்பிஎம் (HBM) சிப்களையும் தயாரிக்க இலக்கு நிர்ணயித்துள்ளது.
மறுபுறம், DRAM சிப் தயாரிப்பில் கொடிகட்டிப் பறக்கும் சிஎக்ஸ்எம்டி (CXMT) நிறுவனம், தலைநகர் பெய்ஜிங்கில் புதிய ஆராய்ச்சி மற்றும் தயாரிப்புப் பிரிவை உருவாக்கி, ஒய்எம்டிசி-க்கு போட்டியாக 3D NAND ஃபிளாஷ் ஸ்டோரேஜ் சிப்களைத் தயாரிக்கத் தீவிரமாகத் தயாராகி வருகிறது. வரும் 2028 முதல் 2029-க்குள் இந்த தயாரிப்பு முழு வீச்சில் பயன்பாட்டுக்கு வரும் என எதிர்பார்க்கப்படுகிறது. இதனால் இரு சீன நிறுவனங்களும் தங்களின் பரஸ்பர தயாரிப்புக் களங்களில் நேரடியாக மோதும் சூழல் உருவாகியுள்ளது.
இதையும் படியுங்கள்: 51% அதிரடி தள்ளுபடி! 55 இன்ச் Acer QLED கூகுள் டிவி மாஸ் ஆஃபர்!
Semiconductor Patent Battles & Global Shortage
காப்புரிமை யுத்தமும் சர்வதேச சந்தை வாய்ப்புகளும்: ஒய்எம்டிசி நிறுவனம் தனது சொந்த தயாரிப்பான 'எக்ஸ்டாக்கிங்' (Xtacking) தொழில்நுட்பத்தின் மூலம் 294-லேயர் 3D NAND சிப்களை வெற்றிகரமாக உருவாக்கி சாதனை படைத்துள்ளது. சாம்சங் போன்ற சர்வதேச முன்னணி நிறுவனங்களே இவர்களது காப்புரிமை தொழில்நுட்பத்தை லைசென்ஸ் எடுத்துப் பயன்படுத்த ஒப்பந்தம் செய்துள்ளன. அமெரிக்காவின் கடுமையான வர்த்தகத் தடைகளுக்கு மத்தியிலும் ஒய்எம்டிசி வளர்ந்து வரும் நிலையில், சிஎக்ஸ்எம்டி நிறுவனம் இந்த காப்புரிமைச் சிக்கல்களை எவ்வாறு கடந்து ஸ்டோரேஜ் சிப்களைத் தயாரிக்கும் என்ற மிகப்பெரிய சவால் எழுந்துள்ளது.
அதே சமயம் அமெரிக்க, கொரிய மற்றும் ஜப்பான் நிறுவனங்களின் சிப் விலை உயர்வு காரணமாக, சர்வதேச ஸ்மார்ட்போன் மற்றும் கணினி தயாரிப்பு நிறுவனங்கள் மாற்றுத் தேர்வாக இந்த சீன சிப் தயாரிப்பாளர்களை நாடத் தொடங்கியுள்ளன. இதனால் சீன நிறுவனங்களுக்குப் பன்னாட்டுச் சந்தையில் கூடுதல் கதவுகள் திறக்கப்பட்டுள்ளதோடு, சர்வதேச செமிகண்டக்டர் சந்தையின் சமன்பாட்டையே இந்த உள்நாட்டுப் போட்டி புரட்டிப் போடும் என எதிர்பார்க்கப்படுகிறது.
